Á þessum morgunfundi var fjallað um hönnun og framkvæmd á mannvirkinu sem hlaut Grænu skófluna árið 2022 – leikskólann Brákarborg í Reykjavík að Kleppsvegi 150-152, í eigu Reykjavíkurborgar. Þær Gyða Mjöll Ingólfsdóttir og Sólveig Ingimarsdóttir héldu erindið fyrir hönd Reykjavíkurborgar, og vinna þær báðar á skrifstofu framkvæmda og viðhalds hjá Reykjavíkurborg. Gyða Mjöll er verkefnastjóri umhverfismála og Sólveig er verkefnastjóri í nýbyggingum og jafnframt verkefnastjóri framkvæmdarinnar.

Það er margt sem er til fyrirmyndar við endurbyggingu Brákarborgar. Markmiðasetning verkefnisins var metnaðarfull, bæði hvað varðar samfélagsstarfsemina og árangur í umhverfismálum. Við hönnun var stuðst við lífsferilsgreiningu og gerður samanburður á umhverfisáhrifum byggingarefna, og efnisvalið var svo byggt á niðurstöðunum. Byggingin er í BREEAM vottun á hönnun og framkvæmd og þannig mun eftirfylgni staðfesta sjálfbærnimarkmiðin. Byggingin hýsir mikilvæga samfélagslega þjónustu en einnig getur lóðin nýst þeim sem búa í nærumhverfi hennar. Steypt burðarvirki var nýtt áfram, og þannig var kolefnisspor byggingarinnar haldið í lágmarki. 

​